LA GUERRA NUN YE UN XUEGU

El manifiesto que vién darréu puede firmalu cualesquier organización que-y preste, amás de colexos, institutos, asociaciones de pás, de tiempu llibre rellacionaes cola infancia y colectivos de barriu.PA FIRMAR EL MANIFIESTU PUEDEN ESCRIBIR A: laguerranoesunjuego@gmail.com (por favor, incluyir nome, apellíos y dni)
LA GUERRA NUN YE UN XUEGU

Reclutar neños y neñes soldáu ye una práctica habitual nel senu de munchos conflictos en tol mundu. En dalgunos, años y años de guerra agotaron a los adultos n’edá de combatir: sólo queden neños. Los neños soldáu garanticen la "protección" a munches families si los entreguen a los exércitos. Dalgunes bandes armaes recluten neños cenciellamente pa que nun los reclute l’enemigu. Aprosimadamente unos 250.000 neños y neñes muerren asesinaos en conflictos armaos cada añu, 400 millones d’ellos sufren esplotación llaboral y dos millones son víctimes de tráficu sexual, sigún datos del Centro Reina Sofía para el Estudio de la Violencia.

Paradóxicamente, en munches de les feries infantiles que s’organicen a lo llargo y ancho del Estáu español (JUVENALIA, JUVELANDIA, EXPOJOVE) foi aumentando cuantitativa y cualitativamente la presencia de les Fuercies Armaes y cuerpos policiales, n’espacios destinaos a la infancia y la mocedá, onde habríen d’impulsase en teoría actividaes lúdiques de calter creativu, cooperativu y non violentu.

Si mos centramos en JUVENALIA, la feria añal que s’organiza nes instalaciones del IFEMA en Madrí, la presencia y’l despliegue organizáu poles Fuercies Armaes ye impresionante y a toes lluces escesivu: práctiques de tirolina, tanques, emulación de la desactivación de mines por parte de neños y sesiones d’adiestramientu de perros.

Subir a un tanque como si fuere un xuegu ye una manera de manipular a la infancia: ¿por qué los organizadores nun despliquen a los/les neños/es que la guerra nun ye un xuegu y qu’eses armes maten na vida real? ¿Por qué l’Exércitu nyn desplica que les misiones humanitaries son en realidá un intervencionismu camufláu pa controlar zones qu’interesen económicamente a los Estaos occidentales ricos? ¿Por qué nun despliquen que’l presupuestu de defensa d’esi país pa 2007 ascenderá a 8.049.990.000 euros, l’aumentu más grande en 20 años, mientres se incumple la promesa d’aumentar el presupuestu dedicáu a investigación científica básica y de separtar estos presupuestos de la investigación militar?

Y anque seya perdoloroso y paeza increíble, nun podemos escaecer los escesos de los exércitos nes intervenciones humanitaries: la cadena inglesa BBC descubrió nuevos alegatos d’abusu sexual infantil pola parte de les fuercies de paz de Naciones Xuníes. Una investigación punxo de manifiestu la esistencia de dellos casos de prostitución de menores y violaciones pola parte d’integrantes de les misiones n’Haití y Lliberia.

Mientres les alministraciones dicen nes sos lleis y nos sos discursos qu’apuesten pola Educación pa la Paz, la convivencia y la non violencia, per otru lláu sofiten iniciatives qu’eduquen a los nuesos neños/es en valores opuestos dafechu y siguen gastando’l dineru públicu en preparar les guerres.

Por too ello, les organizaciones abaxo firmantes desiximos que nun se vuelva a dar espaciu al Exércitu nin a denguna otra organización armada en JUVENALIA nin en denguna otra feria infantil o xuvenil.